ഉപ്പാന്റെ കത്ത്!

--------------------
പ്രിയപ്പെട്ട മകനേ,
നിനക്ക് സുഖം തന്നെയല്ലേ..?
നിന്റെ പഠിപ്പൊക്കെ നന്നായി പോകുന്നു എന്ന് കരുതട്ടെ..
നീ ഇപ്പോള്‍ വലിയ എഴുത്തുകാരനായിട്ടുന്റെന്നും പത്തയ്യായിരം കൂട്ടുകാരും ഒക്കെയായ് ഫേസ്ബുക്കോ അങ്ങനെന്തോ ഒന്നില്‍ വളരെ സജീവമാണ് എന്നൊക്കെ നിന്റെയൊപ്പമുള്ള അപ്പുറത്തെ ബാപ്പുഹാജിയുടെ മോന്‍ കഴിഞ്ഞ തവണ ബാംഗ്ളൂരീന്ന് ലീവിനു വന്നപ്പോ പറഞ്ഞു.
അനീതിക്കും അഴിമതിക്കും അക്രമത്തിനുമൊക്കെ എതിരായി നീ ഫേസ്ബുക്കിലൂടെ പട നയിക്കുന്നു എന്നും നിനക്കവിടെ വലിയ പേരാണ് എന്നുമൊക്കെ അറിഞ്ഞ് എന്റെ കണ്ണ് നിറഞ്ഞു.
സന്തോഷായി മോനേ..
ആങ്കുട്ട്യാളായാല്‍ അങ്ങനെ തന്നെ വേണം...

ഇതിനിടയ്ക്ക് ഏതോ ഒരു സൂപ്പര്‍മാര്‍ക്കറ്റ് വരുന്നതിനെതിരെ ചിലര് പ്രതിഷേധമായി വന്നപ്പോള്‍ അതിനെതിരെ നിന്റെ ലേഖനങ്ങളാണ് ജനങ്ങള്‍ ഷെയര്‍ ചെയ്ത് ഫേസ്ബുക്കിലൂടെ ആകെ നിറഞ്ഞ് നിന്നത് എന്നും പറഞ്ഞു കേട്ടു.
വളരെ വളരെ നല്ല കാര്യം..

ആ സൂപ്പര്‍മാര്‍ക്കറ്റ് വന്നതിനു ശേഷം ആള്‍തിരക്കാണ്..
അവിടെ വില അല്പം കൂടുമെങ്കിലും എപ്പോഴും ആള്‍തിരക്കാണ്..സാധനമിട്ട് കൊടുക്കുന്ന കവറിനു വരെ അവര്‍ വില ഈടാക്കുന്നുണ്ടത്രേ. എന്നാലും നമ്മുടെ ആളുകള്‍ക്ക് അതൊന്നും പ്രശ്നമില്ല..നമ്മുടെ വാഴയുടെ ഇണ്ണിക്കമ്പും ചക്കക്കുരു വരേയും അവിടെ പാക്ക് ചെയ്ത് വെച്ചിരിക്കുന്നു. കാശ് അല്പം കൂടിയാലെന്താ..എല്ലാം ഒരു കുടക്കീഴില്‍ ആര്‍ഭാടത്തോടെ വാങ്ങാമല്ലോ..ജനങ്ങള്‍ സന്തോഷിക്കട്ടെ..ആര്‍മാദിക്കട്ടെ..
നീ പറഞ്ഞ പോലെ ധാരാളം സൂപ്പര്‍മാര്‍ക്കറ്റുകളും ഹൈപ്പര്‍മാര്‍ക്കറ്റുകളും ഒക്കെ വരട്ടെ
ആയിരമോ പതിനായിരമോ ഒക്കെ ചെറുപ്പക്കക്കാര്‍ക്ക് തൊഴിലും കിട്ടുമല്ലോ..
നാട് പുരോഗമിക്കട്ടെ അല്ലേ..
നമ്മളായിട്ട് അവരെ എതിര്‍ത്ത് പിന്തിരപ്പന്മാരാവാന്‍ പാടില്ലല്ലോ..!!

പിന്നെ പ്രധാനകാര്യം പറയാന്‍ വിട്ടു.
നിന്റെ പഠിപ്പ് മതിയാക്കി നീ തിരിച്ച് പോരൂ.
ഇനി കാശയക്കാന്‍ ഉപ്പാനെക്കൊണ്ടാവില്ല മോനേ..
നമ്മുടെ ആകെ വരുമാനമാര്‍ഗ്ഗമായിരുന്ന പലചരക്കുകടയുടെ
അടുത്താണല്ലോ അവര് പുതിയ മാര്‍ക്കറ്റ് തുടങ്ങിയിരിക്കുന്നത്.
അത് കൊണ്ട് തന്നെ ഉപ്പാന്റെ ഉപ്പാന്റെ കാലം മുതല് കൊണ്ടു നടന്ന
നമ്മുടെ ആ കട
ഇന്നലെ
പൂട്ടി.

പ്രിയത്തില്‍
നിന്റെ ഉപ്പ
(ഒപ്പ്)